Manchester United ayaa shaqada ka ceyrisay Erik ten Hag kadib markii ay kooxda wajaheen guuldarrooyin badan.Erik ten Hag ayaa laga ceyriyay shaqada macallinnimada Manchester United kadib markii axadii 2-1 looga badiyay kooxdiisa kulan Premier League ah.
Jarrod Bowen ayaa daqiiqadihii ugu dambeeyay rigooro u dhaliyay West Ham, taas oo Manchester United u dirtay kaalinta 14-aad. Man United ayaa keliya seddex guul ka heshay sagaalkii kulan ee ugu horreeyay ee xilli ciyaareedkan horyaalka.Ten Hag wuxuu ku dhowaa inuu shaqadiisa waayo xilli ciyaareedkii hore kadib markii ay kooxda ku dhameysatay kaalinta siddeedaad, balse guul dhiirigelin ah oo ay ka gaareen Manchester City finalkii FA Cup ayaa sababay in loo kordhiyo qandaraaskiisa ilaa 2026. FA Cup-ka wuxuu noqday koobkii labaad ee uu Ten Hag ku guuleysto intii uu joogay Old Trafford, ka dib markii uu 2023 ku guuleystay koobka Carabao Cup
“Waxaan Erik uga mahadcelineynaa wax walba oo uu naga caawiyay intii uu nala joogay waxaana u rajeyneynaa mustaqbal wanaagsan,” ayaa lagu yiri United bayaan ay soo saareen Isniintii.“Ruud van Nistelrooy ayaa si ku-meel-gaar ah ula wareegi doona shaqada kooxda isagoo taageero ka helaya mas’uuliyiinta kooxda hadda jira, inta laga helayo macallin rasmi ah.”
